Ilustración: Iago Valverde
Ilustración: Iago Valverde

A Expulsión dos Mouros

Historia de cando os mouros abandonaron o Galiñeiro deixando os seus tesouros enterrados

A convivencia dos nosos labregos cos mouros, como podemos comprobar, tiña os seus riscos. Ás veces, estes seres sentían que non eran correspondidos: non se gardaba un segredo, non se cumpría un pacto, actuábase movido pola codicia, etc. Entón castigaban o humano, ás veces cruelmente.
Ademais, a teimuda pervivencia no tempo de comunidades formadas por xentís, entes que non abrazaban o cristianismo, condenounos a unha feroz persecución por parte da igrexa católica, que seguiría o ronsel evanxelizador aberto a golpe de espada por santos e herois cristiáns.
Desta maneira, no Coto da Mó, situado a carón da Loma da Sorra (chamada tamén Galiñeiro de Gondomar), existe unha marca nunha pedra semellante á escorregadura da pata dun cabalo. Segundo unha tradición, é a pegada do cabalo branco de Santiago, que deixou cando chegou a estas terras para expulsar os mouros.
Segundo outras versións, non foi Santiago, senón un pequeno fato de viciños quen expulsou os mouros da serra. Idearan para iso unha ocorrente estratexia: prenderan unhas velas nos cornos dun bandizo dunhas duascentas cabras, con cadansúa campaíña pendurada do pescozo.
Unha noite, botaran a correr o rabaño infernal polo monte mentres berraban:

Faine foina, foina faine,
faine foina, foina faine!

Os mouros foron expulsados entón da serra:

“Adiós España, donde dejo mi morada,
donde quedan os ghalleghos,
tirando co ouro as cabras”.

Cóntase que naquel entón abandonaron o Galiñeiro, mais deixando enterrados os seus tesouros. O seu ouro e a súa prata ficaban submetidos a encantamento, de modo que só quen coñecera a forma de os desencantar tería a chave que permitiría acceder a eles. E iso, ás veces, acontecía…
RODRÍGUEZ GONZÁLEZ, Afonso. A memoria da pedra. Lendas do monte Galiñeiro. En: Clube Espeleolóxico Maúxo. As covas de Vincios. Comunidade de Montes Veniñais en Man Común de Vincios. Vigo: 2005. p. 142

Acerca de cartografías sensibles

Cartografías Sensibles é un proxecto que aposta pola defensa e a posta en valor do patrimonio da parroquia de Vincios e da Serra do Galiñeiro.

Trátase dunha achega virtual a unha realidade territorial rica e complexa a través de mapas que nos fan descubrir historias, topónimos, muíños, covas, penedos, xacementos arqueolóxicos, lendas, músicas e tantos outros elementos que configuran a identidade deste lugar.

A Comunidade de Montes de Vincios leva anos promovendo a multifuncionalidade dun espazo vivo, con infinidade de posibilidades tanto productivas como ambientais ou de lecer. Unha contorna especial na que conviven os usos dos recursos naturais coa paixón pola natureza en todas as súas formas e actividades, así como coa conservación das tradicións, dos valores naturais e do patrimonio cultural.

Axenda de Eventos

No hay eventos programados.

View Calendar

Contacta con nós

O teu nome (requerido)

O teu email (requerido)

Asunto

Mensaxe

Acepto a Política de Privacidade